He pūrapu toro-tahi a Kāuta ngā pakihi kai Māori katoa huri noa i ngā rohe whānui o Aotearoa. Kei te whakarewaina te wāhanga tuatahi o rātou pūhara motuhake.

He utu-kore a Kāuta ki te kiritaki, ki te kaiwhakaputa anō hoki. Nā Rewi Spraggon (Ngāti Hine, Te Waiohua, Te Kawerau a Maki, Ngāti Maniapoto) rāua ko Grant Kitchen (Tūwharetoa – Ngāti Hikairo, Ngāti Kahungunu ki Pukehou) te pūtea i tū ai a Kāuta Ltd. He ara māmā te pūrapu atamai nei, mā ētahi pāwhiri ruarua noa iho e tutuki ai te rapunga. E taea ana ngā hua o te rapunga te whakahāngai ki ngā toa hei toro ā-tinana atu māu, te whakahāngai rānei ki ngā toa tuihono, ā, ka kawea atu te kai ki a koe. 

He pakihi auaha a Kāuta, he pakihi hautū Māori nō roto i te rāngai kai ahuwhenua, ka takea mai i te rohe o Manawatū. Ko tōna whāinga, ko te hāpai i ngā pakihi iti me ngā kaiwhakaputa iti, he āta whiri i ngā hononga whaihua ki te taonga nui nei, te kai. 

Ko tā Grant Kitchen, “ko tō mātou iho, he raranga hononga, he whakatenatena tōpūtanga mahi tahi, auahatanga anō hoki. E tino whai ana kia māmā ake tā te marae, tā te ringawera, tā te wharekai tūmatanui kimi kai pai tuputata, me te hono anō i a rātou ki te hunga whakaputa i aua kai.” 

I whānau mai a Kāuta i Manawatū, he huānga nō roto i te rāngai kai ahuwhenua whakahira o te rohe, inā ōna umanga whakanuia e te ao, ōna pūtoi motuhake, ōna mātanga pūtaiao, ōna kairangahau, me ōna kaipūhanga, tae atu ki ngā ratonga hāpai i te pakihi hou. Koia rā te tōpūtanga o te hunga auaha, o te ringa raupā, o te hunga waihanga, e mahi tahi ana mō te anamata o te kai haere ake nei te take. 

E toru ngā uara matua ka whāia e Kāuta i te whānuitanga o ā rātou mahi, kia wātea ai te ara rēhita mō ngā pakihi Māori manatoko katoa. 

Manaakitanga – hei tautoko, hei whakanui i te hunga whakaputa kai Māori 

Kaitiakitanga – ka takea mai ngā tikanga pakihi me ngā matatika i te kaupapa Māori, i te tirohanga Māori e  hāngai ana ki te toitūtanga 

Kotahitanga – ka  tautokona te kaupapa o te kai motuhake (te rangatiratanga o te kai) mō Aotearoa whānui. 

E ai ki tā Kat Wade, Kaitohutohu Whakawhanake Pakihi Māori i te Central Economic Development Agency, e tino hāngai ana te kaupapa a Kāuta ki ngā ‘whāinga nui’ mō te rohe.  

“He pakihi ahurea auaha a Kāuta, e tino hāngai ana tōna kaupapa ki te rāngai kai ahuwehenua o te rohe. Ko tā rātou mahi ki te hāpai i te auahatanga pakihi, i te toitūtanga anō hoki e tino hāngai ana ki te matawhānui mō te rohe, kia tū hei pokapū kai ahuwhenua whakahira, hautū i te ao,” te kōrero a Wade.  

E mōhiotia whānuitia ana a Manawatū hei pokapū auaha mō te kai ahuwhenua, koia te rohe tuatahi o Aotearoa ki te whakawhanake i tētahi rautaki Hangarau Ahuwhenua. Arā ngā whakahaere whakahira o te rohe e hautū ana i te ahuwhenua, pērā i ngā umanga rangahau karauna e toru, i a FoodHQ Aotearoa, Finistere Ventures, Sprout Agritech, Fonterra R&D, AgResearch, me ētahi atu.  

Neke atu i te 3,900 ngā mātanga pūtaiao me ngā kairangahau e noho mai ana ki Papaioea, waihoki he wāhi whakahira ake i tāone nui kē mō te kai me te inuinu. He rohe hūmārie a Manawatū ahakoa ōna tutukinga nui i te rāngai kai, nā whai anō te whakatūtanga o Kāuta i konei.  

Ko te matawhānui a Kāuta, ko te whakaū i te tōmautanga me te toitūtanga o te ara tukutuku Māori, mā reira e whakanuia ai te whakapau werawera a ngā kaipāmu me ngā kaiwhakaputa, e tautini ai, e toitū ai te popono ki ā rātou kai. Arā, kia tū whakahī tonu ngā tikanga me ngā taonga tuku iho o Aotearoa i te atamira o te ao, i te taha o whenua kai whakahira kē atu, e whakamanawatia ai te mātātahi ki te whai i tēnei ara, i whakairotia ai e ō rātou tīpuna. 

Ahakoa ngā piki me ngā heke o āpōpō mai, ka tū tonu a Kāuta ki te hāpai i ngā kaupapa Māori, pērā i ngā mahi tāpoi, i ngā taiopenga me ngā marae papakāinga. E hīkaka ana kia horapa whānui te pūhara o Kāuta ki Aotearoa whānui, ā, ka whakatenatenahia ngā pakihi huri noa kia eke mai ki te wāhanga tuatahi o te kaupapa. 

Mēnā he pakihi Māori manatoko nō roto i te rāngai kai, he wharekai tūmatanui rānei e rapu ana i tētahi ara tūhono auaha ki te kiritaki hou, e wātea ana te rēhita i te paetukutuku a Kāuta, https://kauta.co.nz/register 

He mea tautoko a Kāuta Limited e CEDA me tā rātou ranga tohutohu pakihi, inā te whiwhi tohutohu āwhina me ngā whakapiringa whaihua. Ka mahi tahi ēnei mātanga me ngā pakihi o tata ki te tuku āwhina, ki te ārahi, ki te tūhono hoki ki ngā kaupapa ako e wātea mai ana. Ka āwhina hoki tā mātou ranga nei i ngā pakihi pēnei i a Kāuta ki te tūhono ki ngā momo whakahaere pērā i Talent Central mō te kimi kaimahi, me Central Skills Hub mō ngā taputapu me ngā rauemi, e ekea ai ngā taumata o angitu. 

English version available here

Our Supporters

We’re a well connected team and couldn’t make such great things happen without our supporters.